موقتەدا سەدر رابەری رەوتی سەدری عێراق لەمیانی سەردانەكەی بۆ ئەو وڵاتە لەگەڵ میر محەمەد بن سەلمان جێنشینی سعودیەو چەند بەرپرسێكی تری ئەو وڵاتەدا كۆبووەتەوە.
بە پێی هەواڵ دەری ئەهلی بەیت.ع.ابنا: ئەم سەردانەی سەدر بۆ سعودیە لەكاتێكدایە كە مانگی رابردوو عیراق و سعودییە رێككەوتن لەسەر پێكهێنانی لیژنەیەكی هەماهەنگی بۆ پتەوكردنی پەیوەندییە ستراتیژییەكان، هەردوو وڵات خوازیارن كە پەیوەندییە سیاسی و ئابووری و دیپلۆماتییەكانی نێوان هەردولا باشتر بكەن.
پێشتر نووسینگەی تایبەتی سەدر لەبەیاننامەیەكدا بڵاویكردبوەوە، سەدر لەسەر بانگهێشتێكی فەرمی شا سەلمان، پادشای سعودیەن بەرەو ریازی پایتەختی ئەو وڵاتە بەڕێكەوتووە.
لەماوەی چەند رۆژی ڕابردوودا بەغدا و ڕیاز رێکكەوتن كە حەوت دەروازەی سنووریی لەنێوان هەردوو وڵاتدا بۆ ئاڵۆوگۆڕی كاڵا و شمەك بكەنەوە، هەروەها رێكکەوتن لەسەر كردنەوەی هێڵێكی ئاسمانی و كاراكردنەوەی هێڵی شەمەندەفەر بۆ گواستنەوەی گەشتیاران و كەلوپەل و ئەو هاوڵاتیانەی بە مەبەستی حەجکردنی سەردانی سعودییە دەکەن.
